ரஜினிக்கு பிறகு கருமை நிறத்துடன் வந்து சினிமாவில் வெற்றிபெற்ற ஒரே கதாநாயகன் இவர் தான். இதுவரை 150 படங்களுக்கு மேல் நடித்து அதில் குறைந்தது 100 படங்கள் வெற்றிபடமாக நடித்து திரைத்துறையில் யாரும் தொடமுடியாத உச்சத்தில் இருந்தவர்.
இன்று காக்கிசட்டை அணியும் ஒவ்வொரு இளம் கதாநாயகர்களுக்கும் ரோல் மாடல் இவர் தான், ஏறக்குறைய 50 படங்களுக்கு மேல் போலிஸ் அதிகரியாக நடித்து சாதனை படைத்தவர். அதில் ஊமை விழிகள், புலன் விசாரணை, மாநகரகாவல், கேப்டன் பிரபாகரன், வல்லரசு, வாஞ்சிநாதன், அலெக்சாண்டர், சத்ரியன், சேதுபதி IPS, விருதகிரி என அடுக்கி கொண்டே போகலாம்.
இது மட்டுமில்லாமல் இன்றைய இளம் தலைமுறை நடிகர்கள் ஒரு பக்கம் வசனம் பேசுவதற்கே திண்டாடுகிறார்கள். ஆனால் நம் கேப்டன் பேச ஆரம்பித்தால் கண்ணம் துடிக்கும், கரண்ட் பாக்ஸ் வெடிக்கும். நாட்டில் உள்ள அனைத்து பிரச்சனைகளையும் ஃபிங்கர் டிப்பில் வைத்து, ஒரே டேக்கில் பேசி பார்ப்போரை தண்ணீர் குடிக்க வைப்பார்.
சினிமாவில் உச்சத்தில் இருக்கும் போதே தமிழக அரசியலில் காலடி எடுத்து வைத்து, அதிலும் வெற்றிபெற்று இன்று தமிழகத்தின் எதிர்கட்சியாக வளர்ந்து நிற்கிறார். தமிழகத்தில் உள்ள அனைத்து கிராமங்களிலும் இவருக்கு தனி ரசிகர் பாட்டாளமே உள்ளது. இவை ரஜினி, கமல் ரசிகர்களையே மிஞ்சும் என்று சொன்னாலும் ஆச்சரியப்படுவதற்கு இல்லை. ஏனெனில் தவசி, சின்ன கவுண்டர், சொக்கதங்கம் போன்ற பல கிராமத்து கதைகளில் நடித்து எல்லோரையும் கவர்ந்தவர்.
இவர் தமிழ் திரையுலகிற்கு விடை கொடுத்து, அரசியலுக்கு சென்றாலும் இவர் எப்போது மீண்டும் காக்கிசட்டை அணிந்து நடிப்பார் என்று தமிழக மக்கள் அனைவரும் காத்துக்கொண்டு இருக்கின்றனர். இன்னும் அவரது ஸ்டையிலேயே சொல்ல வேண்டுமென்றால் ‘வரனும் நீங்க பழைய பன்னீர் செல்வமா வரனும்’.
