கேரள மாநிலத்தில் வயநாடு நாடாளுமன்ற தொகுதி, சேலக்கரை, பாலக்காடு சட்டசபை தொகுதிகளின் இடைத்தேர்தல்கள் நவம்பர் 13-ம் தேதி நடைபெறுவதாக அறிவிக்கப்பட்டன. இந்த நிலையில் பாலக்காட்டில் பிரசித்திபெற்ற கல்பாத்தி விழா நடைபெறுவதால் தேர்தல் வரும் 20-ம் தேதிக்கு மாற்றிவைக்கப்படுள்ளது. வயநாடு நாடாளுமன்ற தொகுதி மற்றும் சேலக்கரை சட்டசபை தொகுதிகளுக்கான இடைத்தேர்தல் நேற்று நடைபெற்றது.
பிரியங்கா காந்தி முதல் முதலாக தேர்தலில் போட்டியிடுவதால் வயநாடு தொகுதி தேசிய அளவில் கவனம் ஈர்த்தது. வயநாடு நாடாளுமன்ற இடைத்தேர்தலில் காங்கிரஸ் வேட்பாளராக பிரியங்கா காந்தியும், பா.ஜ.க வேட்பாளர் நவ்யா ஹரிதாஸ், சி.பி.ஐ வேட்பாளர் சத்யன் மொகேரி ஆகியோர் தீவிர பிரசாரம் மேற்கொண்டனர். பிரியங்காவுக்காக ராகுலும், சத்யன் மொகேரிக்கு ஆதரவாக கேரள முதல்வர் பினராயி விஜயனும், நவ்யா ஹரிதாசை ஆதரித்து மத்திய அமைச்சர் சுரேஷ்கோபி-யும் பிரசாரம் செய்தனர். வயநாட்டில் நேற்று வாக்குப்பதிவு நடைபெற்றது.
வயநாடு நிலச்சரிவு நடந்த முண்டகை, சூரல்மலை பகுதிகளைச் சேர்ந்த மக்கள் மாற்று இடங்களில் தங்கவைக்கப்பட்டுள்ளனர். அவர்களுக்கு வாக்களிக்க சிறப்பு ஏற்பாடுகள் செய்யப்பட்டிருந்தன. நிலச்சரிவால் பாதிக்கப்பட்ட முண்டக்கை பகுதியைச் சேர்ந்தவர்களுக்கு மேப்பாடி அரசு மேனிலைப் பள்ளியில் வாக்களிக்க வசதி செய்யப்பட்டிருந்தது. அதில் ஒரு பெண்ணின் வாக்கை ஆள் மாறாட்டம் செய்து வேறு யாரோ செலுத்தியுள்ளனர். அவரது வாக்கை தவறுதலாக யாரோ செலுத்தியுள்ளதாகவும், அந்த பெண்ணுக்கு வேறு வாக்களிக்க ஏற்பாடு செய்தும் அவர் சம்மதிக்கவில்லை என வாக்குப்பதிவு மையத்தில் உள்ள அதிகாரிகள் தெரிவித்துள்ளனர். இதுகுறித்து விசாரணை நடந்து வருகிறது.
சேலக்கரை சட்டசபை இடைத்தேர்தலில் 72.77 சதவிகிதம் வாக்குகள் பதிவாகியிருந்தது. அதே சமயம் வயநாடு நாடாளுமன்ற இடைத்தேர்தலில் 64.72 சதவிகிதம் வாக்குகளே பதிவாகின. வயநாடு இடைத் தேர்தலில் சமீபகாலங்களில் இல்லாத அளவில் வாக்குப்பதிவு சதவிகிதம் குறைந்துள்ளது. 2009 நாடாளுமன்ற தேர்தலில் 74.86 சதவீதமும், 2014 தேர்தலில் 73.2 சதவிகிதமும், 2019-ல் 80.33 சதவிகிதமும், கடந்த ஏப்ரல் மாதம் நடந்த நாடாளுமன்ற பொதுத்தேர்தலில் 72.92 சதவீதம் வாக்குகளும் பதிவாகியிருந்தது.
இந்த நிலையில் நேற்று நடைபெற்ற இடைத்தேர்தலில் 64.72 சதவிகிதம் வாக்குகளே பதிவாகியுள்ளது அரசியல் கட்சிகளிடையே கலக்கத்தை ஏற்படுத்தி உள்ளது.
வயநாடு தொகுதியில் கடந்த 2019 பொதுத்தேர்தலில் ராகுல் காந்தி 4,31,770 வாக்குகள் வித்தியாசத்தில் வெற்றிபெற்றார். கடந்த ஏப்ரல் மாதம் நடந்த நாடாளுமன்ற பொதுத்தேர்தலில் வயநாடு தொகுதியில் போட்டியிட்டு வென்ற ராகுல் காந்தி 3,64,422 வக்குகள் வித்தியாசத்தில் வெற்றி பெற்றார். பிரியங்கா முதன் முதலாக தேர்தலில் போட்டியிடுவதால் இந்த இடைத்தேர்தலில் 5 லட்சம் வாக்குகள் வித்தியாசத்தில் அவரை வெற்றிபெறவைக்க வேண்டும் என காங்கிரஸ் கட்சியினர் டெல்லி தலைமைக்கு வாக்குறுதி அளித்துள்ளனர்.
ஆனால், வாக்குப்பதிவு சதவிகிதம் குறைந்ததால் வெற்றி பெற்றாலும் வாக்கு வித்தியாசம் குறையலாம் என காங்கிரஸ் கட்சியினர் கருதுகிறார்களாம். நிலச்சரிவு பேரிடருக்கு பின்னர் பல்வேறு மக்கள் இடம் பெயர்ந்தது வாக்கு சதவிகிதம் குறைந்ததுக்கு ஒரு காரணமாக சொல்லப்படுகிறது. மேலும் இடைத்தேர்தல்களில் வாக்கு சதவிகிதம் குறைவது வழக்கமானது தான் என்ற கருத்தும் நிலவுகிறது.!
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
https://bit.ly/UlagaiMaatriyaThalaivargal
