விருதுநகர் மாவட்டம் ஸ்ரீவில்லிபுத்தூர் துடியாண்டியம்மன் கோவில் தெருவைச் சேர்ந்தவர்கள் பாண்டியராஜ்- கமலா (வயது 48) தம்பதியினர். இந்த தம்பதிக்கு ஒரு மகள் உள்ளார். பாண்டியராஜ் தூத்துக்குடி மாவட்டம் கயத்தாறில் தங்கியிருந்து வேலை பார்த்து வருகிறார். மகள் திண்டுக்கல்லில் உள்ள ஒரு கல்லூரியில் படித்து வருகிறார். இந்தநிலையில், மகளின் படிப்புக்காக, கமலா ஸ்ரீவில்லிப்புத்தூரில் உள்ள தனது வீட்டை பூட்டிவிட்டு திண்டுக்கல்லில் வாடகைவீட்டில் வசித்து வருகிறார். அவ்வபோது ஊருக்கு வந்து தேவையான வேலைகளை முடித்துவிட்டு திரும்பவும் திண்டுக்கல்லுக்கு புறப்பட்டு செல்வதை கமலா வாடிக்கையாக கொண்டுள்ளார்.
அதன்படி கடந்த 16.8.2024 தேதியன்று மாலை 5 மணிக்கு வீட்டை பூட்டிவிட்டு ஸ்ரீவில்லிபுத்தூரில் இருந்து திண்டுக்கல்லுக்கு புறப்பட்டுள்ளார். அப்போது, லாக்கர் சாவியை தவிர்த்து வீட்டுச் சாவி உள்பட மற்றவைகளை பக்கத்து வீட்டுக்காரரிடம் கொடுத்துவிட்டு கமலா திண்டுக்கல் புறப்பட்டுச் சென்றுவிட்டார்.
இதனைத்தொடர்ந்து கடந்த ஜனவரி 13ம் தேதி ஸ்ரீவில்லிபுத்தூருக்கு திரும்பி வந்த கமலா, பக்கத்து வீட்டுக்காரரிடம் கொடுத்து வைத்திருந்த சாவியை பெற்று வீட்டை திறந்து உள்ளே போய் பார்த்துள்ளார். அப்போது பீரோவில் உள்ள லாக்கர் கதவு நெம்பி உடைக்கப்பட்டு இருந்தது கண்டு அவர் அதிர்ச்சி அடைந்தார். இதையடுத்து லாக்கரில் இருந்தவற்றை சோதனை செய்து பார்த்தபோது அதில் இருந்த சுமார் 15.5 பவுன் தங்க நகைகள் திருடு போயிருந்தது தெரியவந்தது.
வீட்டில் ஆள் இல்லாததை நோட்டமிட்ட மர்ம நபர்கள் யாரோ திட்டமிட்டு நகை திருட்டில் ஈடுபட்டிருப்பது கண்டுபிடிக்கப்பட்டது. தொடர்ந்து இந்த சம்பவம் குறித்து ஸ்ரீவில்லிபுத்தூர் நகர் காவல் நிலையத்தில் புகார் அளிக்கப்பட்டது. அதன்பேரில் போலீஸார் வழக்குப்பதிவு செய்து விசாரணை நடத்தினர்.
போலீஸின் விசாரணையில், துடியாண்டியம்மன் கோவில் தெருவைச் சேர்ந்த ஜோதி மணிகண்டன் (வயது 22) என்பவர் சமீபத்தில் 1.20 லட்சம் மதிப்புள்ள புதிய பைக் வாங்கியிருப்பது தெரியவந்தது. இதையடுத்து சந்தேகத்தின்பேரில் ஜோதி மணிகண்டனை பிடித்து போலீஸார் விசாரணை நடத்தினர். இதில் அவர், கமலா வீட்டில் நகை திருடியதை அவர் ஒப்புக்கொண்டார்.
தொடர்ந்து அவரிடம் விசாரணை நடத்தப்பட்டதில் திருடிய நகையை மம்சாபுரத்தைச் சேர்ந்த ரஞ்சித்குமார் என்பவர் விற்றுக் கொடுத்ததும், நகைகளை உருக்கி அதை தங்கக்கட்டிகளாக மாற்றிக்கொடுத்தது அதே பகுதியைச் சேர்ந்த கோபிநாத் எனவும் கண்டுபிடிக்கப்பட்டது. இதையடுத்து, ஜோதி மணிகண்டன், ரஞ்சித்குமார் மற்றும் கோபிநாத் ஆகிய மூவரையும் போலீஸார் கைது செய்தனர். அவர்களிடமிருந்து 15.5 பவுன் தங்க நகை பொருள்களும் பறிமுதல் செய்யப்பட்டது. தொடர்ந்து கைது செய்யப்பட்ட மூவரும் நீதிமன்றத்தில் ஆஜார்படுத்தப்பட்டு சிறையில் அடைக்கப்பட்டனர்.
கைது செய்யப்பட்டவர்களில் குறிப்பாக ஜோதி, மணிகண்டன் மீது தென்காசி, சங்கரன்கோவில், இராஜபாளையம், ஸ்ரீவில்லிபுத்தூர், விருதுநகர் ஆகிய காவல் நிலையங்களில் குற்ற வழக்குகள் நிலுவையில் உள்ளது குறிப்பிடத்தக்கது.
